呢個系列實在好受歡迎，原因不明。唔知係because of我啲求其相，定in spite of

TLDR：邊爐經濟學。五舊水銅鑼灣不限時任食邊爐，六點打到十一點，世界難撈。同場加映我樓下茶餐廳嘅象人精神

1. 你話「個撚個都係商場專家食家？」，扯，個撚柒個都係金融專家啦。邊個網友唔係至撚醒料事如神？係唔知點解仙都唔仙之嘛

2. 咁但，講返，星期二，某知名財經KOL叫我去打邊爐。有人想識我咁話（呢句嘢令我有啲擔心）。名人叫到，我仆到去。結果一行八人，十分好。

3. 相都唔係好得閒影，專心食嘢傾計

4. 咁但，講返生意呢。任食邊爐。好唔好食？OK啦。

5. 但偉大在乜？不限時任食。真正嘅無限Q，就真係…….後生仔嘅天堂。

6. 結果？就六點幾食到十一點幾。五個鐘頭任食，都幾係嘢。有埋間房添。

7. 價錢？「我都冇睇」。但唔平的，最平好似四舊幾水，最貴好似上七舊。「七舊水食任食邊爐？」—扯，咁你七舊水食自助餐咪又係咁。

8. 考慮到七舊水畀間房你坐，仲要六點打到十一點，仲要任食，就好合理嘅。當然我地呢老嘢就食唔到好多，如果後生仔食得多就「回本」

9. 然後諗下，成件事都幾合理。金朝陽嘅樓上舖，好似十樓定乜。而家都好少會有第二輪客。

10. 租就都係畀咁多，人工就都係咁多。呢啲最大成本。又唔會早啲趕你走就可以做多幾枱客。咁不如索性豪畀你，畀你坐到尾，但收你貴啲。變相就等於一輪做兩輪客之嘛。況且，肯定你唔會食到兩輪客咁多嘢啦。

11. 當然廢老又可以話經濟差。DLLM七舊水打餐邊爐都經濟差，香港人真係幾撚有錢！你在第度七舊水餐飯好大件事。香港就「經濟差」

12. 不過，條街夜晚就真係明顯少咗人嘅。原因就好多人解過，但肯定唔係「經濟差」—DLLM，望下對面海香港人飛機打到出馬六甲嘅新加坡，乜撚銀行乜撚遊客香港人中國人咖喱人鬼佬都去晒，舊年GDP增長，1%多啲。我留名又睇啲專家話「GDP唔代表經濟」—咁乜先代表？任鳩佢講

13. 但同時間亦要講，有時都雞先蛋先。我見啲友話「冇生意餐廳咪唔開」，而我屌咗好多次，你唔開我又點幫襯？咁雞先蛋先。

14. 但有實驗啦，我樓下某茶餐廳，之前都係九點定九點幾Last Order，而家玩到十點幾Last Order，十一點先收皮

15. 多唔多人？好撚多人喎。說好了的冇客。根本你開啲人先有得嚟。然後開咗，咪真係見到有人嚟囉。

16. 講到尾，其中一個大原因都係：人工。租就都係咁多，但人工好多斷鐘計。更大鑊嘅係：你估你肯畀多兩個鐘錢，人地就同你做多兩個鐘？DLLM 茶仔水吧都同你講work life 巴撚呀！（＊）

17. 事實係，間茶仔啲服務態度，都幾惡劣（嘢食是OK的）。特別係廚房，仆街，隔住個出餐位都聽到佢地啲怒氣，炒蝦拆蟹，粗口連天，屌客屌老細屌香港屌大陸屌美國。完全「我是憤怒」

18. 但吹咩？而家打工仔惡過老細惡過客。當然佢係知道「炒鳩咗我丫，炒鳩我老細你自己落場炒牛河」。知道自己價值，當然得戚，好合理。衰得過啲客嚟食呀。有才華，係應該串啲嘅。「唔撚啱你自己入去炒丫？」（對，任何批評我啲文垃圾嘅人，我都會叫佢「你自己寫一篇」）（＊＊）

19. 至於我嘛，馬蘭頭遠庖廚，就盡量唔好坐嗰邊位。費事聽到啲廚房佬係咁屌客。「我估在日本人地象人精神真係唔會咁」（＊＊＊），就算會，都係講日文，out of 西out of mind（＊＊＊＊）

20. 但講到尾，身體很誠實啦。我係咁多不滿嘅，就唔去食啦。雖然以上行為是唔好的。但，我還是幫襯，還是好慶幸佢開得夜。

21. 因為有啲人係夜食飯夜收工的，例如埃汾太。之前間問嘢九點Last order，我真係一個星期都未必同佢食到一次晚飯（呼）。而家就好好多了。

22. 廚房佬狂妄屌客屌老細嘅（呢方面好一視同仁！），有得佢囉。都係嗰句，坐遠啲，聽唔到。錢鍾書話頭，食隻煎雙蛋（？）就算啦，唔使睇隻雞咩樣嘅

（＊）呢度又嚟文化偏見。如果係個靚仔西廚講work life 巴撚你覺得好合理，Barista（講英文型啲）你又覺得好合理。但沖奶茶都work life巴撚你就O嘴。難道Barista就象人精神，沖奶茶就唔匠人精神？你啲網友個撚柒個返公司呃飯食廿年，就話「廿年經驗」。埃汾寫文四十年，考試拎嚟A，搵埋食，紙媒專欄都近一千篇，Patreon又過千篇，有質有量，就唔撚專業？但日日咪又畀你啲網友屌。你唔去屌人地沖咗廿年奶茶唔識沖？話說回頭，你返咗廿年工廿年經驗又點？香港大把廢老四五十年屌西含撚經驗添呀，唔見個個出嚟講talk？

（＊＊）然後又係永恒嘅：「我使唔使好波過美斯先可以批評佢」嘅終極哲學問題。聽落好簡單，其實唔係。睇下幾時我得閒到寫篇四千字文解。

（＊＊＊）屌過多次啦，當年D2嗰間日本嘢，貴夾唔好食就正常。但佢老母個廚係咁撚同個客吹水講晒粗口—呢個都唔係問題。但佢唔戴口罩喎（疫前情嘅事）！但佢一路整緊嘢食喎！我個人嘅包容度好高，但呢啲真係不撚能接受。當然有人又可以屌（啲人真係乜都要拗）你只係用一餐飯就judge人地。DLLM啦，大撚把人咪又係睇我幾篇文扮好了解我。你一定要由我第一篇文睇起呀

（＊＊＊＊）正經，呢個都係個好重要嘅課題。話說我啲東京港人讀者，十個有九個都睇唔慣睇唔順眼啲日本人。但我地去日本就十分歡喜。你話因為係遊客，固然係。你話因為佢地有啲打日本人工，都係　—　但我一樣見到有啲長居日本嘅香港人都好爽。知唔知關鍵在乜？「就係你識唔識日文」。識字就係痛苦嘅開始。一方面你可以話你唔識日文就永遠係「外人」，「融入唔到」（但，融嚟做乜？況且，你識日文就融入到？）。但另一方面，啲讀者都回想返：開頭在日本日文唔多好時，就最開心！因為你聽唔明啲人講乜，唔知報紙電視講乜，就好開心。到你識字，「就好難唔吹脹」—　呢個情況，同我在台灣一樣！你聽得明佢地講乜，睇到電視報紙網上講乜，「就好難唔吹脹」。所以真係的，聽唔明最開心，世事嘅嘢，太清楚就唔開心了。

留港消費  By Ivan Li 李聲揚

homeloggglogo

忽然成名嘅嘢。幾廿歲人，唔好咁多性幻想啦．咪講笑，一路睇，我就諗起豬肉威威，似到十足十。忽然成名，眾人集郵，有簽名會，仲有廣告拍，但又忽然消失。而佢其實乜都冇做
1. 我非常鍾意呢套戲，但可能有私心。一來我而家嘅工作，同網上文化好有關係。二來我都46歲，真係「中年」。眾多中年男性KOL，記得去睇呢套戲。
2. 仲有一個原因，尼古拉斯基治，係我早年好鍾意嘅演員。但本文先講套戲，最尾先講佢
TLDR：名成就就，人人想擁有。Rudolph the Red Nosed Reindeer，世態炎涼。酸臭知識份子，幾廿歲人唔好咁多性幻想。Cancel culture嘅嘢。但幾廿歲人，真係唔好咁多性幻想！中年男性KOL，共勉之
3. 基治一開頭已經出場，幾乎認唔到係佢，但一開聲就認得。呢個脫髮大叔造型，實在非常好。唔係嗰啲「扮老」但依然好有型咁嘅款。你絶對唔覺得佢外表有任何吸引力，咁先好。
4. 劇情，你睇官方介紹都知。呢位平凡大叔，忽然出現在眾人夢境中，成為網絡紅人，名成利就。但之後情況急轉直下，佢在人地夢境，變咗變態佬殺人狂，於是又成為過街老鼠
5. 一條咁嘅大橋，劇透晒都得，但你會點拍？幾時都話，originality is overrated，故事設定根本冇乜特別，唔使天才都諗到，亦唔使有科幻頭腦或科學知識，但拍出嚟係乜，點去推進，先見到功力。
6. 導演兼任編劇，名氣唔大，八十後挪威男人，呢套第一套英語片，之前拍套挪威片《病上癮》（我冇睇過），就係拍網絡文化，呃like。今次呢套，亦都有類似嘅主題。
7. 套戲嘅主題有兩個（或者係同一個）：就係網絡年代，人人可以成名，名氣是把雙刃劍，水能載舟又能覆舟，捧得到你上去就拉得到你落嚟，但名氣嘅引誘實在太大了。第二主題，就係講近年嘅cancel culture．
＝＝＝＝＝＝＝＝
8. 睇返主角人設，編導都係個心地好嘅人。基治嘅角色，雖然少少Grumpy，但整體算係個好人，唔係黑人憎貓屎先生，對人整體算nice，對老婆對仔女對同事學生路人朋友都唔算差，冇乜特別好大嘅嘢要挑剔　—就係你和我。
9. 至於佢嘅生活，雖然話係「失意大叔」，但far from 好落泊。教大學喎（雖然係local 雞校），住嘅地方都OK，成套戲冇講佢要為錢煩惱，精神生活都OK，同老婆睇話劇，幾咁中產。老婆同女固然唔係好理佢，但唔係太差啦。好似我篇2023文咁講，可以更差。
10. 呢點係重要嘅，因為呢個係一個「值得救贖」嘅人，本質不壞。
11. 佢最大問題係乜？同好多人一樣，唔知足。志大才疏，覺得自己「唔應該」只係咁。就係嗰種知識份子嘅虛偽同酸臭，總係覺得自己大才少用懷才不遇，其他人唔識貨。
12. 早段嘅劇情已交代呢啲嘢，佢成日又話寫書，但一路都寫唔出。又覺得人地抄佢啲嘢，冇畀credits 佢，「個idea我諗先嘅！冇我邊有你！教識徒弟冇師傅呀！」—舊同事（？）都照直講：你有idea同你真係做到啲嘢，係唔同嘅。就係上面講嘅orientability is overrated，唔好再一日到黑話人抄你啲嘢了。「我夠可以話大把人抄我咁用number 分段寫文啦」（＊）
13. 人地講一句：「唔係個個都出到paper嘅，你在間雞校教，都幾好架啦」—就刺中佢要害啦。佢覺得自己堂堂PhD，搞到搞啲咁嘅蕃薯學生　—　後來佢同個女間學校嘅人嘈，一樣都係咁。「介紹返，本人係PhD，你邊位？BA？MA？」．嗰種高人一等，寫在面上。
14. 但呢啲真係唔係大奸大惡呀，我同你都係咁。所以呢個人，咪會受名利所引誘而迷失。呢個推進好好。
15. 及後，就係佢忽然變咗紅人啦！點解忽然間在人人夢中出現？冇講。後來點解變咗惡夢？點解又消失？都冇解。我覺得聰明嘅，夾硬解反而牽強。況且，根本亦呼應返編導想講嗰個「忽然爆紅，忽然過街老鼠」嘅文化。無啦啦出現，無啦啦玩完。我諗起乜？豬肉威威！
16. 忽然變紅，梗係好啦。我寫過，但凡我識到啲新朋友（特別係青春少艾），聽到佢地講「我有睇你啲文」，我就十分高興。你試過嘅，你都會明白。
17. 呢個年代，（正面地）出名更加好，因為仲可以帶到好多嘢。你睇戲入面，基治爆紅後，成個精神面貌都唔同咗（呢度佢就演得好，例如我用嘅呢張相），依然係核突大叔，但精神爽利，充滿信心，講句嘢都大聲啲。之前小貓三四隻嘅課堂，變咗爆滿，個個爭住問佢嘢。佢親生女都當佢係英雄。然後朋友以前啲飯局都唔叫佢，而家都叫返佢。老婆又對佢好啲，連老婆事業都幫到呀！仲有得同大牌子合作，奧巴馬添呀。成名幾咁好！
18. 以上嘅東西，大家做KOL（或網紅或自媒體whatever），一定經歷過。感覺良好呀。最正係個同事（定校長？）串呀基治，平時就講科學精神，刁而家爆紅咗又相信「冥冥中有主宰」，自己有特別之處，天選之人。完全輸打贏要，自欺欺人。
19. 不過當然了，去到呢啲位，就梗係ego發作。「喂我想賣我本書，唔係賣汽水」，「我唔想第時啲人只係記得我呢啲膠嘢」—明嘅，好似我咁，01年代啲朋友最記得就係我寫「捷克AV」嗰篇文。正如而家你地就記得我貼啲廟街清湯腩或東涌海鮮丼咁。「我認真分析烏拉圭自殺問題，完全冇人理」—　問題係，人地係睇中你夢中爆紅，唔係想睇你啲生物書嘛。咁呢種「你鍾意做嘅嘢，同觀眾想你做嘅嘢，好大落差」，相信所有content creator都有共鳴
20. 當然最重要係乜呀？後生女投懷送抱。呢個真係一絶。後生女話發夢夢到同你做愛喎，不得了，不撚得了呀。然後大叔同後生女飲嘢，依然係講佢上堂講嗰啲斑馬理論，不停重覆，真係中佬特色（我都係！）。
21. 不過估唔到導演絶到安排後生女真係帶佢返屋企想擒佢！點知就胃氣脹（定放屁？），然後未入閘就射咗，真係男人最痛，導演真殘忍　—　留意呢度亦係大叔在眾中夢中由「正面」變「負面」嘅分山嶺，象徵意義好明顯！
22. 幾時都話，幾廿歲人，唔好咁多性幻想。我真係見唔少我好欣賞甚至認識嘅中佬KOL，都係衰呢啲嘢。係架，真係有後生女投懷送抱的　—　但，免費的最貴，唔好睡粉，講完。唔好貪呢啲無謂嘅ego，唔使「證明」自己有吸引力。手尾好長。無數咁多例子。

23. 打後？大叔成為大家嘅惡夢。就由人見人愛，變成過街老鼠。學生唔嚟上堂，個女又憎佢，老婆事業都受打擊，自己都「被休假」，隔離屋都唔歡迎你去食飯，個女嘅演出都唔畀佢去睇，架車又畀人噴嘢。你坐定定在餐廳都有人要你走，甚至主動搞你。
24. 主角心諗，「我冇做過乜嘢喎」　—　不過公平地講，之前名成利就，你咪又係「冇做過乜嘢」。唔可以話佢貪嗰啲名氣最後就有報應，相信佢最初唔去搞嗰啲嘢後果都一樣。反而就係話你知，世事無常，群眾膚撚淺虛撚偽。
25. 當然呢度，亦都攻擊埋近年大行其道嘅cancel culture—啲學生好不安，就又要停佢職，仲要整啲乜鬼治療　—　我好鍾意基治講嗰句：「而家啲友，乜撚都話PTSD，考試唔合格又trauma 　—好心長大啦好冇？」有一定道理。一方面近年丈家都關心精神健康，但另一方面你亦真係睇到，乜都講到創傷，「病」化所有嘢。個平衡在邊？值得諗下
26. 而家乜春都係治療。有藝術治療，有園藝治療，有舞蹈治療—fine，改個名啫。最撚好笑外國仲興「頌缽治療」，聞香都有治療，考張cert就好似好專業 – 唔好意思，我覺得好撚搞笑。埃汾啲文都係文字治療，專醫智障。你好專業？你讀嗰啲戇鳩敲木魚course，上幾多個鐘咁大把？仲要一定pass．你睇下我歷年寫咗幾多隻字？畀人屌咗幾多鑊？誰更專業？
27. 我亦慎防好多人，以為cancel culture係「美國左膠嘢」—肯定唔係。右翼左翼都玩呢啲，只係某段時間某班人大聲啲。而更肯定嘅係，DLLM啦，香港一樣cancel culture，乜撚都政治呀。你啲網友最撚鍾意公審人架啦，你睇柳俊江單嘢？
28. 不過套戲嘅結局，我覺得幾差。編導真係比較好心嘅人，又唔想整到玩出火悲劇收場，但又不能歡樂今宵BBQ大團圓結局大家重新接納佢咁和稀泥，於是用咗而家咁嘅一個……奇奇怪怪嘅結尾。
29. 你畀我寫？好簡單，就係王爾德嘅《快樂王子》。眾人踩到佢一棟到冇，彷佛自己最撚醒。在這夜～這猛火像燎原～大眾議論到這三位少年～就似在怨～用處沒有一點。在這夜～這猛火像燎原～大眾議論到這三位少年～亂說亂說～愈說祗有愈遠
30. 我嘅cynic，好受王爾德影響。細個睇唔明，老師亦唔會講，但大個就知《快樂王子》係佢嘅自白。原本群眾咪覺得你一身金光美麗，但到你唔再靚（講現實中王爾德因為同性戀而入罪），咪人人覺得你核撚突
31. 戲講完，後記寫尼古拉斯基治

32. 上面講到當年基治係我好鍾意嘅演員，你諗下時序上好合理。佢95年憑Leaving Las Vegas（＊＊）拎咗奧斯卡最佳男主角，千禧年前後最紅，拍咗好多大片，正係我大學年代，開始有錢有時間有自由，睇好多戲嘅年代。
33. 之後呢？好多人都知，佢成為爛片王。都有朋友聽到佢個名就怕，所以錯過咗呢套戲，上網睇返。
34. 2011年，可謂基治「爛片生涯」嘅顛峰，佢一年三套戲提名金草苺，好似係個紀錄。其中最爛嗰套叫Trespass不忠之劫，美國收兩萬美金（你冇睇錯）票房。外國收得好啲，仲有老本食，仲有啲鐵粉入場睇，例如我，但當然套戲都係蝕到仆街。另外兩套？一套係Drive Angry，冇睇。另一套Season of the Witch，有睇，堅唔掂。
35. 因乜搞到拍咁多爛片？其中一個原因係財政問題，爭人錢。明明之前超高片酬（聽聞一年4000萬美金），可見佢理財極有問題。亂咁買嘢啦（買過恐龍骨！），投資失利啦，逃稅啦　—　小朋友真係留意，亂咁投資好大件事，爭稅局錢更大件事。
36. 仲有，佢啲感情史都係比較……精彩。里安納度狄卡比奧同佢就一齊爭恐龍骨，大家都係鍾意後生女（誰不愛？），但人地就識玩，永遠唔結婚。基治就結五次婚離四次，有個結幾日就離婚。結婚外仲要啤幾件，呢啲開支都幾係嘢。呀仲有，雖然佢同狄卡比奧都係鍾意後生女，但口味就唔同，眾所周知狄卡比奧鍾意金髮白人長腿大胸model，但基治就口味廣，而近幾任都係亞洲女，甚至receptionist 都食都娶埋。更不用講佢都唔少官司，又家暴又欠稅（再講一次，欠稅是很大罪的）
37. 鹹濕無罪，鍾意後生女都無罪，但由呢啲事你大約睇到，當年佢個人嘅私生活，真係相當多問題。
38. 特登將佢本人留到最尾先講，希望大家鍾意呢個舖排。
（＊）我的確敢講，近乎我係最早咁寫文，唔少人都直接或間接受我影響。亦都好多人鬧，但話撚知你。你見到，真係好有用的，特別係你地回文refer嗰時。根本就係利人利己，但一樣有人要諗，正式四方西。
（＊＊）呢個故事應冇講過。話說港大舍堂O Camp時要去「做visit」，同啲大仙傾下計。實務上就係啲禽獸大仙見到仔就玩下佢兇下佢，見到女就睇辦pre IPO。但後話。其中一個我好記得嘅女仔，是「超仙」，因為呢個女仔讀PCLL，應該大我三四年起碼。但佢同我傾得好投契，佢好欣賞我，我甚至仲記得佢叫乜名。點解？因為唔知講起乜，就講起Leaving Las Vegas套戲，講愛情講人生，時為1997年．科華同我講，冇一個新鮮人同佢傾到呢啲，甚至差不多年紀嘅男仔佢都覺得好幼稚。《那些年》是真的，女仔真係一般成熟過同年紀嘅男仔，所以普遍情侶男大過女，唔止係因為錢。不過唔使問，後來係冇任何事發生嘅—咁大個圈，我無非想講：潘驢鄧小閒，我係好識同女仔傾計嘅，甚至當年我都未知。因為我細細個就對住成班女人，我個妹，我老母，仲有一堆阿姨同表姐。我成長身邊係冇乜陽氣嘅。亦因為咁，「馬蘭頭」之前，個Page叫做「華麗後台」—Daniel Day-Lewis套戲，亦係講「成棚女人」嘅故事。但因為個Page名引起太多誤會，所以改咗名。